Musidɓe tedduɓe, ko adii fof, mino winnda seeɗa he nguurndam am, kono tan neɗɗo winnda nguurndam mum, wonaa huunde weeɓnde.

Homboo woni Sammba Jaamanka ?

         Woni Sammba Jaamanka ko : Suleemaani Jaamanka, o jibinaa ko he hitaande 1947 he saare maama makko , ndeen wonin : saare Demaraa, sera Bantankuntu mawnde, ndeer biiwol Kamako, gonngol he tunndu Fuladuu he ngenndi Senegaal.

Baaba makko wi’etee ko : Demmba Jaamanka, ko adii nde kaaw makko tuubnata baaba makko, ɓaawo baaba makko tuubii, naatii he diine Lislaam, o waɗtaa noddireede Ibrahiima Seeku walla Seeku Ñaari.

So tawii ko neene makko, o wi’etee ko Kummba Baalnde, kono nde wonnoo neene makko, kanko neh wi’etee ko Kummba, ko ɗuum waɗi kanko o nodditee ko : Kummbaaru Kummba Doomel, golle maɓɓe ko demal e ngaynaaka, miin neh ko ɗuum woni ko njannginaami, gila njibinaami haa keɓmi duuɓi sappo e nayi (14), ɓaawo ɗuum njanngoymi Qur-aana to Ndakaaru (Dakar) laamorgo Senegaal he duɗal ceerno : Muntagaa Taal, tuggude 1959 haa he hitaande 1968, ko he Ndakaaru ngonmi, mino jannga Qur-aana e ñaawooje Lislaam, caggal ɗuum perammi janngoyde faade fuɗnaange,ngam ɓeydoyde ganndal, ko feewti he diine Lislaam.

Ko he ndeer hitaande 1968, woni ko njottiimi ngenndi Liibi naattumi janngirde toownde wonnde he saare wi’eteende : Jagbuub, ɓeydumi ɗoo jande diine Lislaam e gannde kese, caggal ɗuum he maayirɗe hitaande 1969, min paatiniraa to saare wi’eteende Baydaa he ndeer ngenndi Liibi, ko ɗoon ngonmi haa he gasirɗe hitaande 1972, ngarmi he duunde Orope, naatirmi ko he ngenndi Itali, ɓennumi njahmi Suwis e Almaañ e Faransi, oon yonta wonnoo he miijo am, so guurte ngasii tan mi ruttoo Liibiyaa, ngam haa mi waawa jokkude jande am, kono nde ngami he saare wi’eteende Bordoo, miijo am waylii, pellitmi naattude janngirde toownde he Bordoo, ngam etaade waylude ko njanngumi koo he Arab, mi waɗta ɗum he ɗemngal Faransee, kono nde njanngumi haa timmi lebbi (6) tan faawre mawnde heɓimmi, naatoymi safrordu (Hopital), mbaɗmi toon fotde duuɓi nayi (4), nde njaltumi safrordu, pellitmi liggaade, mboppumi jande, ngontumi liggotooɗo perɗo (imigere).

Kono tan, ko gila nde ngonnoomi to Liibiyaa puɗɗunoomi janngude Pulaar, ko ɗuum waɗi ; nde ngarmi Bordoo he hitaande 1972, mi pellit darnude duɗal Pulaar, kono oon yonta men mbaanoo ko no catal hii he kawtal janngooɓe Pulaar he ngenndiiji Arabeeɓe gonngal to laamorgo ngenndi Misira (Egypte) Keer (Caire).

Kadi ko caggal nde njaltumi safrordu, ndesmi ɓiɗɗo denɗiraawo am, bi’eteeɗo Kummba Maanee Baalnde he hitaande 1977, min keɓdi sukaaɓe jowo, ɓeen ngoni : Mbaafu Galo, Demmba Kummba, Tiida Sira, Gelaajo Sammba boɗeejo e Mawnde Linet Sabeeli.

Wanndiraaɓe tedduɓe, ko ɗum ɗoo ko seeɗa he jubbannde nguurndam Sammba Jaamanka, mino yetta en he tiiɗnaare men he yiɗde ɓamtude leñol men, yoo joomiraaɗo toowɗo oo wallu en, okka en kaɗtanɗe ballooje en he waawde siinude muyaaɗe me, on njaraama.

Bordoo ñande 15/03/09.                 Sammba Jaamanka.

         Musidɓe tedduɓe, mino fillanoo on seeɗa he kuulle haalirde wonnde he haaɗtirde janngirde wonnde he Bordoo, ko hikka waɗta duuɓi jeenayi, gila min keɓi yeewtere he haalirde rajo kampus, ngam ko ñande 08/03/2001, min puɗɗii yeewtude he rajo kampus Bordoo, gila ñannde heen kala asawere (hoore biir) he tuma 18 h00 haa he tuma 19 h00, ko minen ngonta ɗo haalirde ɗoo.

         Yeewtere amen wi’eteenoo ko konngol kawtal, haa nde kawtal waylaa he hitaande 2004, gila ndeen yeewtere amen wi’etee ko konngol Tabital Pulaaku, halfinaa yeewtere nde ko goomu pinal peŋgal Tabital Pulaaku Bordoo he gardagol Sammba Jaamanka e Aliw Mbaalo e Mammadu Mbaalo, wallataɓe he waawde siinude golle ɗee ko : Tiida Jaamanka e Gelaajo Jaamanka, ko mine ɓee ndefaa golle ɗee, kono tan goomu pinal e yimɓe peŋgal catal Tabital Pulaaku Bordoo, fofof no mballa min he yeewtere ndee ; heen woɓɓe ko noddat he noddirgel rajo kampus, woɓɓe ngara ga haalirde gaa, kadi Afriknaaɓe heewɓe ɓe ngonaa fulɓe na keɗoo, na nodda walla Oropnaaɓe hoɗɓe he saare Bordoo e seraaji mayre, ngam yeewtere ndee ina firtee he ɗemngal Faransee.

         Yeewtere amen ɓuri yowitaade ko he pinalfulɓe e tawaa-tawi maɓɓe e darnde maɓɓe he diine Lislaam e jokkondiral e jillondiral maɓɓe he leƴƴi, ɗi ɓe koɗdi he duunde Afrik.

Laaree natal haalirde rajo kampus

         Ngal natal ɓaŋaa ko to haalirde rajo kampus, woni junngo ñaamo Sammba Jaamanka, ko ɓiɗɗo makko debbo wi’eteeɗo : Tiida, woni junngo makko nano ko Abdu Salaam Soh, hucciti he makko ko Tubaako gollodooɗo he makko, natal lees woni heen ko ɓiɗɗo makko mbi’eteeɗo : Gelaajo Jaamanka.                                                      Sammba Jaamanka.