Haalirde wi’eteende

 FM Tabital to Bamako , Mali

  Caggal yettude Geno e juulde e Nelaaɗo yoo (J.K.W.) So ɗum ɓennii, ko calminaali ceniiɗi feewde e kala ɓiy PULLO, ɗo tawaa e jookli winndere ndee. Mi salminii ɗum, mi bismiima joom-mum e hoore muuɗum; So ɗum ɓennii, ɗum ɗoo ko seeɗa e ko min keɓi siimtande ceerno Mammadu Jah, kalfinaaɗo jaaynde men ‘’ Konngol Pulaaku ‘’, nde o ari ɗo e Bamako , Mali , e lewru Colte 2008, ko faytiri e saaktirgo Tabital-PULAAGU Bamako (T. P. B.). Mbiyen miijo ngoo ɗoofii ko e yeewtere ɓee ɗoo hatanteeɓe lenyol, yarlitnooɓe jolnude juuɗe e jeybaaji mum en, njaltina toon buuɗi njoɓa jom caaktirɗe, tawa wonnoo faandaare maɓɓe e ɗum ɗoo ko ngam yiɗde yantinde sonndu e lilluɗe, mbele diwda e diwooji; tawa kadi ɓe mbaɗatnoo ɗum ko e caaktirɗe dowla Mali, ɗo e Bamako; Waɗatnoo ɗum ko ɓee ɗoo:  Ceerno Hamma SIISE, Muktaar BAH, Seek KAN e Seeku BOOKUM. Ko ɓee ɗoo ngonnoo waɗatnooɓe ɗee ɗoo jeewte e caaktirɗe goɗɗe e nder Bamako (L. D. M.), haa noon ɓe mbaɗti danyde heen caɗeele mawɗe e kunuɗe lohotooɓe ɓe, sabu wiyde ɓe minen PULAAR haaletaake e Rajo amen, hay so on njoɓii milyaar. Jooni noon, rajo wooto jaɓnoongo jaɓɓaade jeewte maɓɓe ɗee ngo, ngoon wiyetee ko JEE-KAFO; no jeewte ɗee poti yuɓɓude , gorko gooto ine wiyee Sori-Ibraahiima SILLAA, nani jeewte ɗee no poti faayodinde, o noddi gorko biyeteeɗo Kolonel Iila SIISE, yo o tiiɗno waɗta heɗtaade ko ɓee ɗoo hatanteeɓe lenyol kaalata koo; ko ndeen Kolonel SIISE heɗtii yeewtere nde weli ɗum no feewi , felliti wallude ɓe, tawa ko ballal baɗtindoowal. O noddi batu, o wiyi ɓe ngare mba-ɗen fedde, ɓaaro-ɗen e Tabital-PULAAGU, ndaarten RAJO. Ɓe immaaki haa ɓe cosi ɗoon  e ɗoon catal ndaartooɓe jawdi ko soodiraa RAJO Tabital-PULAAGU.

Horeejo teddugal fedde ndee wonno ko bani men debbo biyeteeɗo Faatimata DIKKO, ko oon noon woni jettaniiɗo en mawɗo leydi ndii oo, Aamaadu Tumaani TUURE (A. T. T.), walliti en milyonaaji joy ( 5 000 000 fr ). Tawa ine jeyanno e ko ndeen fedde miin e hoore am, Bookar Alfaa BAH, Hamma SIISE, Bara BOOKUM Bayya-Waare NYAŊAADU, Muktaar BAH e Seek KAN. Ko minen ɓee ɗoo ndarii, heddiiɓe ɓee nyasi min haa jawdi RAJO ndii heɓii, milyonaaji sappo e ɗiɗi pawɗi ( 12.000.000....)

 RAJO ngoo soodaa e innde Tabital-PULAAGU fof. Amin nyaagoo Geno, yo o newnan en RAJO Tabital PULAAGU Winndere ndee (aamiin). Siimti haalaka ko gooto e hatanteeɓe lenyol ngol to Bamako (L. D. M.), jom kuɗol oo noon ko almuudo PULAAR ine wiyee Haadii Maaliki SIH, jeyaaɗo leydi Nyooro to wiyetee Korkaaƴel, jom Deftere wiyeteende (HAALDE TIIƊAANI, TIIƊI KO WAƊDE) jom deftere ine wiyee (SAMMEERE JIME PULAAR) e woɗnde ine wiyee (JIGE MAAMA AM NAYEEJO) e woɗnde ine wiyee (BONE FICCAT LAACI) e woɗnde ine wiyee (NYOOSAL REWƁE ELI-JAAƳE EMALI-MALAAƊO) Amin nyaagoo Geno yo o ɓamtu ɓamtooɓe PULAAR haa toowa no ERO aamiin

 Roɓindo :

 Bookara Alfaa BAH