En ngartii e loawre ngoƴa ɓiɓɓe Afriknaaɓe e woƴaaɓe ɗumen, ko fayti e laawol ɓamtowol so moƴƴii, kalkowol so hormaaka, ngool woni dawrugol (politik).

 Afrik noon, ko ɓuri 98% ardiiɓe doŋre nde ndokkaani ngol laawol fotde mum, haa ko ɗuum waɗi laamuuji ɗi ndalƴat e kala nyallal.

 Laar Gine Bisaawu, ɗii duuɓe jawtu ɗi kala ko roŋkaama tan yo jam danye, haa laaminooɗo yahde e waraango naatoy e ngaska yahii wontaa artu ( waraama).

 Gine Konaakiri, e lewbi jawtuɗi ɗi, dadiiɓe ɓe padaani nii hay kaylitagol gite walla maale joofgol Laasana laatoo, ɓe pawi takke maɓɓe e ko fotnoo roneede e ko fonaani roneede kala, ɓe kolliti laawol deftere nyaawoore (constituions) ndonu laamu leydi ndi, ko musiiba wonande ɓesngu Gine.

 Ɗuum noon, ɓe ngalaa heen hannde, ɓe ngalaa heen janngo, Kamarel heɓii laamu, sukaaɓe mum poɓɓi, mbiyi : » … «   en ngartoyat heen.

 Senegaal, duuɓi 9, ardiiɓe jaagorɗe njeegomo hannde o, sabu ko alkamiis haŋki 30/04/2009 gardinooɗo jaagorɗe o woppiti ko nannginanoo so ardaade jaagorɗe, goɗɗo toɗɗaa yo jogo.

 Oon ne jooɗiima, e dow kaaƴe gulɗe, tawi kennebbe mbooy ena ngutta baŋ-yoo-baŋ faggudu leydi ndi, ko teskini heen e ngaa sahnga, ko Njolnoowa senegaal International  ( Air Sénégal International) ko ko jooɗtii e doole mum gila aljuma 24/04/2009, goranam ko suka kecco mo suwaa tawa diwde,jogori yahde tawa ɗaccaani yo Geno danndu heen senegaalnaaɓe. Ko noon ne Sonatel, Senelec ekn…

 Koddiwaar, gila 2005, cuɓagol mawɗo leydi fotnoo yuɓɓineede e no deftere nyaawoore leydi ndi wiyri, so ko laataaki (woto mem maayaa, haɗi ɗum yuɓɓineede) , nde wonnoo alaa majjuɗo finnere jaggal Ofoyi finniriɓe, Ndeke nyaagunde fulɓe nyaagotoo nde ena hawri sanne, woto : » Caggal makko finnir en ». Haa leydi ndi feccaa, tawi fof ko bone yiɗde laamaade. Jooni noon jooɗaniiɗo ɓe to ONU hono Alsid Njej (Alcide Djédjé) hollitii nyalnde 28/04/09 t o New York, ko ɓe yuɓɓinooɓe suɓngo ngo hakkunde 11/10 e 06/12/2009 . Ko goonga noon kulhuli keewɗi ena njogaa heen. Yo wonan ɓesngu leydi ndi moƴƴere,

 Muritani, keɓtirnooɗo toon laamu doole mum o, fellitii yuɓɓinde suɓngo laamotooɗo leydi nde nyalnde 06/06/2009 , o hollitii tawde nyaawooje leydi ndi njaɓaani jikku dadiiɗo laamoo leydi ndi, koŋko e nduu lewru 04 o waylii jikku makko, jooni o jogii ko jikku mo meeɗaani wonde dadiiɗo (militaire) , ɗuum waɗi o jeyaama e ƴamooɓe gardagol leydi ndi, haŋki noon lanndaaji 6 mbiyi ko ko mballatamo, o jogtoo gardagol ngol. Ciftoren noon, jikku daadiiɗo mo o woppi o, o resndi ɗum ko BAH Mbaare ɗo galle laamorgo leydi ndi, sabu jikku o ko e galle o jogii suudu haa yeeso ko laawol.

 En ngartan walla ma en ndewindo  ɗee kew kewe jogorɗe waɗoyde so Geno jaɓii, ko noon ne njillorto ɗen denndaangal leyɗe afrik ɗe, sabu ko ngoƴa woƴaaɓɓe afrik.